Gündəlik

Туьркиядин Балыкесир вилаятдин “Dağıstan ve dağıstanlılar” кIватIалдин кьил Жевдет Йылдызаз

2014-05-15

Квез - 154 йис инлай вилик Дагъустандай катиз мажбур хьайи ксарин веледриз гъурбатдин туькьуьл дад хъсандиз чидa. Ингье куьне дарвилеризни четинвилериз килиг тавуна лезгидин тIвар вине кьуна, дидед чIал, халкьдин адетар, ацукьун-къарагъун кьегьалвилелди хвена, къени хуьзва.
Шумудни са йисар тир чал Туьркиядин лезгийрикай хабарар хъуьтIуьн рагъ хьиз кьериз-цIаруз агакьиз. И хабаррин арада “Dağıstan ve dağıstanlılar” кIватIалди кьериз яди кьиле тухузвай мярекатрин суракьарни авай. А хабарри чахъ лувар кутадай. Ингье чун Туьркиядин лезгияр акунихъ цIигел тир. Яраб абуруз дидедин чIал чизматIа, яраб чи адетар хуьзматIа? -лугьуз веревирдер ийидай чна. Эхиримжи йисара дуьньяда хъсан патахъ кьиле физвай демократиядин дегишвилер себеб яз, гьакIни интернетдин куьмекдалди чаз чун генани мукьувай чир жезва. 2008-йисуз Балыкесир вилаятдин Уртажа (Кирне) хуьре кьиле фейи Хийир межлис, Туьркиядин чара-чара пипIерай иниз атанвай лезгийрияр акурдалай кьулухъ чун гъавурда акьуна хьи, куьн жуван тIварцIелди рикIивай дамахзавай халисан лезгияр я.
Жевдет стха! 20 йис я куьне кIватIалдиз регьбервал гуз. Куьне ва Туьркиядин куьн хьтин вилик-кьилик квай лезгийри чи ватанэгьлияр сад-садав агудзава, абурун рикIери ватан кIанардай, хайи чIал кIанардай гьиссер кужумиз тазва. Мурадар кьилиз акъуддай нуьсрет гурай квез Аллагьди. Квез чандин сагъвал, рикIин шадвал, руьгьдин кьакьанвал тIалабзава чна. Чна квелди дамахзава.

ЧIехи гьуьрметдалди Седакъет Керимова,
зари, «Самур» газетдин кьилин редактор