Gündəlik

«Самур» куьреда мугьманвиле

2016-05-07

Алай йисан 7-майдиз Дагъустан Республикадин СтIал Сулейманан райондин кьил Нариман Абдулмуталибован теклифдалди райондин медениятдин кIвале Бакуда акъатзавай «Самур» газетдин кIвалахдаррихъ галаз гуьруьш кьиле фена. Куьревийри газетдин кьилин редактор Седакъет Керимова, редактордин заместитель Муьзеффер Меликмамедов, гзаф йисара газетда мухбирвиле кIвалахай Роза Гьажимурадова хушдаказ кьабулна.

Мярекат райондин медениятдин отделдин кьил шаир Майрудин Бабаханова ачухарна. Мугьманри Бакуда лезги чIалал акъатзавай «Самур» газетдикай, дидед чIал хуьн паталди чпи кьиле тухузвай крарикай малумат гана. Райондин хуьрерай, къунши районрай, гьакIни Дербентдай атанвай поэзиядал рикI алай инсанри шаирар М.Меликмамедован ва С.Керимовадин шииррихъ яб акална. Ахпа «Сувар» ансамблдин маничи Роза Гьажимурадовади лезги халкьдин манияр жанлу ванцелди лагьана. Мярекатдал «Куьредин ярар» медениятдин меркездин кьил Агьмедпаша Агьмедпашаева ва масабуру къелемэгьлийрин яратмишунрикай чпин фикирар лагьана. Шаирар Сажидин Саидгьансанова, Абил Межидова, Зарина Мустафаевадини чпин шиирар кIелна.

«Самур» чаз мугьманвиле» тIвар алаз арадал гъанвай ва гзаф гурлудиз кьиле фейи мярекатдин эхирда райондин кьил Нариман Абдулмуталибова мугьманриз вичин разивал къалурна ва гележегда ихьтин гуьруьшар мадни тухун чпин эрзиман тирди малумарна.

И мярекатдай чун луварар акатнаваз, руьгь ацIанваз хтана. Иллаки зав вугай 101 марвардин цуькведин кIунчI рикIелай тефир багьа савкьват хьана.