Блог

     ЦIуд йис инлай вилик акунай заз и зари. Вичин 70 яшар хьанвайтIани викIегь тир, гележегдик умуд кваз рахазвай. ЧIехи хизандин кьил тир ада вичин рухваяр, рушар вири динжарнавай. Агьил береда уьмуьрдин юлдаш, гуьгъуьнлай чIехи свас квадарай агъсакъалди пуд хтул чIехи авуна кIанзавай. Абурун Бакуда кIвалахзавай бубадивай аялар кIвале текдиз таз жезвач лугьуз гъвечIибур хуьруьз хканвай кьуьзека. Мектебда муаллимвал ийиз, кIвал хуьзвай кас ара-ара къелемдивни эгечIзавай. Са кьадар ктабар кхьенвай ам ара датIана спонсордин суракьда авай. Са мус ятIани вичин ктабар чап жедайдан чIалахъ тир ам.

     Са шумуд йис алатайла мад гъилера дуьшуьш хьана зун и касдал. Агъсакъалдин кефияр хабар кьурдалай кьулухъ адан веледар, хтулар жузуна за. Хтулри институтар акьалтIарнава лагьайла хвеши хьана заз. Ахпа жузун-качузуник кьил кутуна:

     - Ви кьве хвани бизнесменар ялда, авай гаф яни?

     - Эхь!

     - АкI ятIа спонсорвална ви ктабарни акъудиз жеда ман абурувай.

     Вилер ацIана касдин. Са гужуналди вилин накъвар хвена ада. Агъсакъалдин и къариб гьалди къалабулух кутуна захъ.

     - Зи са ктаб кьванни акъатнавач. Папкаяр гьа ваз акурвал хара яна амазма.

     Мягьтел хьана зун адан гафарал:

     - Вуна хвена чIехи авур хтулрин бубадини ви ктабар акъудначни?

     - Ваъ!

     - Вуна тIалабнани бес рухвайривай?

     - Шумуд йисара завай рикIна абуруз са гаф лугьуз хьанач. Чпин кесибвал авурай, кIвачел ахкьалтIайла зун рикIел тахтана жеч абурун, фикирна за. Гагь-гагь заз чпивай куьмек гуз жезвач лугьуз абуру гъам чIугвазвай хьизни жезвай. Анжах эхиримжи вахтара якIа-чIарчIе ава аялар: абурухъ хсуси магазинар, хъсан кIвалер-къар ава, дуьньядилай цIар ягъизва. Тек зун рикIел хквезмач.   Гьич за хвейи хтуларни зав ахгатзамач. Гила хуьре текдиз ама зун.

     - Лугьудай ман рухвайриз, вун спонсордихъ къекъвезвайди.

     - Лугьун квез герек я? Зи харадавай ктабрин папкаяр аквазвачни мегер абуруз?

     Ахпа дертлуз алава хъувуна:

     - Ахьтин гафар ава хьи, абур хайибуруз лугьуз жедач.

     И дуьшуьшдилай гзаф вахтар алатнава, анжах завай кьуьзуь кхьираг рикIелай алудиз жезвач.

     Мад са дуьшуьшди рикI тIарнай зи. Са лезги кхьирагдинни адан чIехи къуллугъдал алай хцин арада ихьтин суьгьбет физвай.

     Бубади: - Вад йис я зи цIийи ктаб акъат тийиз.

     Хци: - Я кас, гъил къачу ктабар кхьинилай. Са кIус жуван къайгъу чIугу. Ша, за ваз путевка къачун, фена курортда ял ягъ.

     Бубади: - КIантIа путевкадин пул зав гице вуна, за жуван ктаб чапдай акъудин.

     Хци: - Бес я ман, ктаб, ктаб... Вахъ маса кар-кеспи авайди тушни?

     Хва бубадин гъавурда акьазвачир. ГьикI акьадай кьван? Ада бубадин са цIар кьванни кIелнавачир. Дидед чIалал кхьизвай вичин бубадикай регъуьзвай адаз...

     Спонсор... Им эхиримжи  вахтара мецера гьатна фад-фад тикрар жезвай гаф я. Спонсор вичихъ са кьадар мумкинвилер авай, масабурухъ рикI кузвай, хийирлу крарихъ къуьн кутазвай, эвез кIан тахьана куьмек гузвай кас я. Ихьтин инсанар дуьньядин вири уьлквейра, гьакI Азербайжандани ава. Чпин къазанжидин гъвечIи са пай Аллагьдин рекье бендейриз харжда абуру.    Виридалайни гзаф руьгьдин инсанриз - зарийриз чпин ктабар акъудиз куьмек гуда а ксари.

     Гьайиф хьи, чи халкьдихъ ихьтин спонсорар тIимил ава. Авайбуруни жуванбурухъ ваъ, патанбурухъ ялзава. Гьар са халкьдин векилри сифте вичин халкьдин тIвар хкажзавай инсанралди дамахда, абуруз куьмек гуз алахъда. Гьайиф хьи, им чибуруз са акьван хас кар туш. ИкI туширтIа, садра чални лезги спонсор гьалтдай, адан захавилин шагьид жедай чун.

     "Самур" газет акъудзавай 15 йисан къене чаз ихьтин бахтлувал несиб хьанач. Ингье чи бакуви къелемэгьлийриз лезгийрикай гзаф спонсорар жагъанва. "Сагъ хьурай чи лезги стхаяр, абурун захавал себеб яз чи ктабар чапдай акъатзава", - лугьузва а ксари.

     Ихьтин ктабрикай сад зи столдал ала. Иердиз чапнавай къалин, амма къене им-ам тарифардай, чарарин кьадар пара къалурун патал чIехи шрифтдалди ганвай текстерилай гъейри затIни авачир и ктабдиз спонсорвал авур "кьегьал лезги" хъсандиз чида заз. Са йис я "Самур" газет кхьида лагьана гаф ганва ада. Анжах вучиз ятIани вичин гаф кьилиз акъудзавач. Чун талун, бес шумудни са йисара хайи чIалал шиирар теснифзавай кьуьзуь шаирдин са ктабдиз спонсорвал ийиз жедачни а "кьегьалдивай"?

     Заз чиз ваъ! Руьгь кьенва эхир. Ихьтинбуру патанбуруз спонсорвал авунни рикI кунин ваъ, ялтахвилин лишан я.

     Садра за спонсоррикай фикирзавай вахтунда чи редакциядиз пагьливандин буй авай са жегьил атана. Вичи Магьачкъалада,  "Лезги газетдин" редакцияда кIвалахзавайди малумарна, документар къалурна чаз. "Дагъустандин лезгийриз куь ктабар кIанзава. За абур магазинра туна, маса гана, квел пул ахгакьарда", - лагьана ада. Ахпа редакциядай зи 600-дав агакьна ктабар, гьакIни 200-даз мукьва дискар тухвана. "Кьегьал лезгидин" гьикI чIалахъ жедачир кьван? Ада куьруь вахтунда герек тир документарни гьазурна, печать яна, са копия зав вугана, муькуьди вичив хвена. Гьикьван хвеши хьанай заз. Ингье и вакъиадилай 7 йис алатнава. "Спонсордикай" гьелени са ван-сес авач.

     Лезги спонсор... Яраб чи халкьдихъ халисан спонсорар авайди ятIа? Белки чаз абурукай хабар авачтIа? Белки абуруз хайи чIалал ктабар акъудун хуш туш жеди?..

 

•