Блог

     Са дагъдин хуьруьз фенвай зун. Патан чIалари басрух ганвачир, вичин верцIивални дад хвенвай дидед чIалахъ яб акалун тир зи мурад. Бадейрин, кьуьзуь ксарин ихтилатрихъ цIигел тир зун. Чи рикIелай алатнавай халисан лезги гафарин суракьда авай зун. Ина хупI серес, михьи лезги гафар галукьзавай зи япарихъ. Анжах са карди зи кьарай атIана.

     Хуьруьн пелелай 40-45 йиса авай са дишегьлиди вичин хайидаз эверзавай:

     - Мама! Я мама!

     - Гьай! - лагьана зи къвалав гвай, чина шуьткьверар авай къари кIвачел къарагъайла, зун къах хьана. 80 йиса авай къаридиз “диде” ваъ, “мама” лугьуз эверзавай хуьруьнви дишегьлидиз килигна за. Шегьердай гзаф яргъал, дагъларин ценце экIя хьанвай и гъвечIи хуьр гьинай, хайидаз “мама” лугьун гьинай?

     Гьа юкъуз 60-80 яшда авай гзаф «мамаяр» акуна заз. Абурун веледриз “диде” гафунин иервал, ял, дад гьикI чир хьурай? Аял дуьньядиз гъайи йикъалай адан бейнида жуван гафар аваз маса чIаларай атай гафар твазвай чи хайибурун, чи дидейрин и карди гьекь акъудна заз. Къвердавай чахъ пис къилихар, кагьалвилер генани гзаф акатунин себеб дуьньядин виридалайни багьа, виридалайни чIехи тIвар - Диде чна рикIелай ракъурун ятIа?..

 

•