Bloq
Кас
Дуьшуьшдай чун гьикI ятIани Худатин ракьун рекьин патав акъвазнавай. Машинда ацукьна хванахвайрин рехъ хуьзвай чна. Кьве жегьил гадади чи вилик квай вагондай залан шешелар авудиз, абур далудал кьуна, чIехи машинриз ялзавай. Шешелрин кIаник юкь какванвай и кьведа ял ягъун тавуна са ялце кIвалахзавай. Акунар авай 24-25 яшарин и гадаяр зегьметдал рикI алайбур тирди гьасятда чир жезвай. Чуькьни тавуна гьа са къайдада, ништа, гьикьван бере тиртIа абуру пар ялиз.
Чна абурун шешелар гьисабзавай: вад, къад, пудкъад... Кьведан пелейни курум-курум гьекь авахьзавай. Абурал алай перемар, на лугьуди, це туна акъуднавай.
Гадайрикай сад - лацу якIарин, кьакьан буйдинди худатвидиз, адалай са тIимил кьван аскIан ва яхунди патандаз ухшар тир.
Нисин хьайила абурун ихтилат галукьна чи япарихъ:
- Ял ягъадани?
- Ягъан ман!
- За исятда фена хъсан са чай гьазурда. За кIваляй фу-къафун гъанва, санал неда чна, - лагьана къумрал гадади.
- Вазни чайдилай гъейри затIни чидай хьтин туш. За исятда фена маркетдай эрекь къачуда, - лагьана лацу гада шегьер галайнихъ фена.
- И чимила вуна эрекьдикай вучда? - мягьтелвилелди жузуна муькуьда.
- Зи юргъунвал эрекьдилай гъейри са куьнини алуддач, - лагьана, лацу гада хъуьрена.
Ракьун рекьин мукьув гьалдай фенвай са куьлуь будка авай. Къумрал гадади анай электрикдин чайник акъудна, адаз яд цана токдик кутуна. Ахпа сабундив гъилер чуьхвена, кIарасдин тапIунал газет экIяна, адан винел фу туна. Суфрадал кьве стакан ва къендни эцигна.
Са герендилай хъуьчIуьк эрекьдин бутылка квай муькуь гада хтана. Ада бутылка тапIунал эцигна сабурсуздаказ лагьана:
- Цуз кван, цуз кван, фада! - Сивик хъвер кваз кап-капунал алтадна ада.
- За чай хъварвал я, за эрекьдив кьадач, чан стха! - Къумрал гадади вичин стакандиз чай цана. - Ацукьа, захъ галаз са кап фу неъ!
Лацу гадади вичин стакан эрекьдив ацIурна, вилер мичIна, ам агалдарна. Ахпа суфрадилай афнидин чIук къачуна, кIанз-такIанз ам жакьвана.
Абур чин-чинал ацукьнавай. Сада иштагьдив нисини фу, афни незвай. Муькуьда тинер алай стакандай эрекь хъваз, ара-ара афнидиз кIас ягъазвай. Къумрал гадади фу тIуьна куьтягьна, чай хъвазвай. Са герендилай лацу гада гьа ацукьай чкадал ахвариз фена. Къумрал гада лагьайтIа, цIийи кьилелай кIвалахдив эгечIна.
Чи патавай са къари алатзавай. Вил илисна килигзавай ада гадайриз. Эхирни эхиз хьанач адавай. Чахъ элкъвена лагьана:
- Чан балаяр, аквазвани квез и кьвед. А чай хъвазвайди бакуви я, киричи я. Вичин гьалал фу тIуьна, кIвалах авуна, къачур гьакъи кIвализ тухузва. Адакай кас жеда. Адан патав гвай йиртих аку, ялна-ялна, гъиле гьатай кепекрив эрекь хъвазвайди. Адакай садрани кас жедач.
Седакъет КЕРИМОВА
