Блог
Шехьзава руьгьер
Квез сагьибар амачир кIвалерин, гадарнавай чилерин, серкIверини вергери, шумудни са эчIелри кьунвай багъларин, барбатI хьанвай саларин агьар ван хьайиди яни? Куьлегар ягъана йисаралди ракIарар ахъайзавачир, хайибурун нефес галукь тийиз уьцIуьзвай кIвалерин цIугъар галукьайди яни куь япарихъ? Бес пехъ ацукьнавай харапIайрин гьараяр таниш яни квез?
Гьа ихьтин гьалар акваз шехьзава чи бубайрин руьгьер. Аялар хьиз ван алаз, гьарайна шехьзава. Гагь-гагь селлер, тIурфанар, цIайлапанар хьана чиляй свар атIуз шехьда руьгьер.
Чи чилерал гьикьван кIвалер иесияр амаз харапIадиз элкъвенватIа чидани квез? Гьисабиз кичIе я, лугьуз регъуь. Талана гьикI акъвазда бес? Экв ахквазмачир дакIарар, цIай кумачир къулар, гум галамачир гурмагъар, иеси амачир кIвалер, руьгь кумачир инсанар вучиз икьван пара хьанватIа? Хайи ватан, бубайрилай аманат яз амай чилер, мукьва-кьилибур гадарна яргъариз акъатнавайбурун, хуьр гьамишалух яз рикIелай ракъурнавайбурун, къариблухар ватандай кьунвайбурун кьадар къвердавай пара жезва. Чеб хвейи, чпиз дидевал авур баркаван, мублагь чилер гадарна къариблухриз акъатнавай, четинвилерикай кьил къакъудиз пурчара кьил хуьзвай ксарин кьадар пара хьанва чахъ. Гьавиляй квадарзава чна кIвални, чилни, Ватанни. Пака мад вуч квадар хъийидатIа? Я квадар тавур вуч аматIа чахъ?
Чил гадарун намус квадарун я лагьанай чи бубайри. КIвал хуьх, чил хуьх, намус хуьх лагьанай абуру. Вири маса гайитIани, чил маса гумир лагьана веси авунай рехибуру.
Шехьда руьгьер. Йифиз сагьибсуз кIвалерин вилик кIватIал жеда абур. Зарулдаказ, рикI атIудайвал, ара датIана шехьда. Са береда чилер абад авур, чапхунчийрикай хвейи чи кьегьал бубайрин руьгьер я абур...
Седакъет КЕРИМОВА
