Блог

ТIвар

- Ваз и тIвар ни гайиди я?
- Зи бубади. Ватандин ЧIехи дяведин вахтунда вичел залан хирер хьана госпиталда къаткай адаз Анастасия лугьудай са урус дишегьлиди къуллугънай кьван. Гьадан хатурдай бубади заз ихьтин тIвар гана.
- Дегишардай ман тIвар.
- Сифте аял яз за и кар байихнач. Гуьгъуьнлай буба рагьметдиз фена, завайни бубади гайи тIвар я лугьуз дегишариз хьанач. Анжах гьайиф! Са уьмуьр гьална, амма вердиш хьанач зун жуван тIварцIив. Масадан пек алукIнавайди хьиз я зун.
- Бес вуна жуван аялриз гьихьтин тIварар ганва?
- Гададиз Жумарт, рушаз Туьтуь. Абур зи яран бубадинни яран дидедин тIварар я. За жуван хтулризни халисан лезги тIварар ганвайди я. Абурукай садан тIвар Саяд, муькуьданди Гатфар я, - лагьана дишегьлиди вичин ихтилат тамамарна.
И мукьвара Дагъустандин са сайтинин материал кIелна за. Ана чпин милливал квадарзавай этносрикай ихтилатзавай. Мисал яз тIварар къалурзавай. Патан халкьаривай гзафни-гзаф тIварар къачунвайбурун сиягьда лезгияр сад лагьай чкадал алай. И тIварарин сиягьни ганвай: Январь, Февраль, Декабрь, Октябрь, Империал, Кардинал, Сократ, Эдуард, Генрих, Айзек, Гамлет, Исидора, Екатерина…
Дегь чIавара лезгийри чпин веледриз анжах лезги тIварар гудай. Абуруз тIвар гузвай югъ хизандин, сихилдин, хуьруьн сувариз элкъведай. Аялдиз вичин тIвар багьаз кьаз, адалди дамахиз чирдай.
Чахъ гзаф шейэр амач. Садбур чавай къакъуднава, садбур чна квадарнава. ТIварар хьиз. Гьар са инсан масабуруз сифте адан тIварцIи - кутугай, маналу, халкьдин чIалав кьадай тIварцIи чирзавачни?.