Блог

Вун женнетдин ахвариз фирай, Асеф Мегьман!


     Зи дагъларин ценер кIанда. Гуьзел рушар, руьгьдин бегьер, Сифетрани авай эквер, Рахадай гьар са гаф гевгьер, Муьгьуьббатдин цуьквер кIанда. И шиирдин автор гьа вичин цIарариз ухшар къени, умун кас тир. Ингье амансуз ажалди лезги халкьдин зурба шаир Асеф Мугьманан уьмуьр кьатIна. И хабарди чи сейли къелемэгьлидин манийринни шииррин дад чидай агъзурралди инсанриз кIевелай эсерна. Лезгийрин тIвар-ван авай композитор, шаир, драматург, кхьираг Асеф Мегьман 1930-йисан 18-апрелдиз КцIар райондин ЭчIехуьре дидедиз хьана.

     1937-йисуз адан буба, хуьруьн мек¬теб тешкилна ана муаллимвал авур Мегьман Абдуллаев "халкьдин душман" хьиз къелемдиз гана, Сибирдиз суьргуьн авурла адан хизан, ругуд аялдин диде Хаселеман ва чIехи велед тир Чимназан хиве гьатнай. Уьмуьрди гьикьван кIевера тунатIани, Асефа гьвечIизамаз кIелуниз майилвал къалурна. Чирвилерал гзафни-гзаф рикI алай ада хуьруьн мектеб акьалтIарна, Къубадин педтехникумда кIелна, Дербентдин педтехникумда кIелун давамарна. Асеф Мегьмана вичин шиирар сифте азербайжан чIалал кхьенай. Гуьгьуьнлай ада лезгидал чIалар теснифна. Тар ягьунал рикI алай Асефа тесниф авур манияр халкьдин меце гьатна.

     1960-йисуз Дагьустандиз куьч хьайила, А.Мегьман лезги чIалал кхьенвай гзаф шиирринни манийрин автор тир. Чи сейли маничи Дуьрия Рагьимовади Бакудин радиодай фад-фад адан "ЧIулав вилер", "Ахвар" манияр лугьудай. Вичихъ зурба алакьунар аваз акур Асеф Мегьман Дагьустандин Радиокомитетдин лезги редакциядин музыкадин гунугрин редакторвиле тайинарна. Ада пенсиядиз фидалди ина кIвалахна. А.Мегьман цIудралди ктабрин, сегьнедал эцигнавай гзаф драмайрин автор я. Вич 2010-йисуз «Дагъустандин халкьдин артист» гьуьрметдин тIварциз лайихлу хьайи Асеф Мегьманан экуь къамат ам чидайбурун рикIера гьамишалух амукьда. Аллагьди рагьметрай!


Сайт сделан в A2Studio