Блог
Каш, тIал, вилин накъвар…
Гьар нянихъ кIвале экрандин вилик ацукьна Африкадай гузвай рикIин гъал атIудай хьтин сюжетриз килигзава чна. Куьч кьамаллаз кьурагьвиликайни кашарикай катзавай инсанрин азабар чIалахъайна рахазва чав. КIарабар гъуьргъуь хьанвай, хамар кIарабрал алкIанвай, кIвачел акъваздай гьал амачир бахтсузбур акваз кьарай атIузва чи. Сомали... кашар, начагьвилер, кьиникьар… хайибурун къужахда чан гузвай аялар. Сомали... яван фахъ, хъвадай цихъ тамарзу хьанвайбурун уьлкве. Гьахъсузвилерин макан. Гьар юкъуз телевизордай сейрзава чна и сюжетар. Дуьньядин гзаф уьлквейрин агьалийри хьиз... Анжах тек са сейр авуна виже къведач. РикI кана абуруз куьмек гузни алакьна кIанзава чалай. Вучиз лагьайтIа чун инсанар я. Авайда авачирдакай, бахтлуда бахтсуздакай, сагъламда азарлудакай хабар кьун чи буржи я. Ингье дуьньядин инсанри телевизордай сейрзава Сомали. Са мус ятIани чи кьилелни сомалидин мусибат къведачтIа нивай лугьуз жеда? Чал ихьтин бахтсуз инсанар тIимил дуьшуьш жезвани? Къачузвай пенсия фаз са гужалди бесарзавай кьуьзуьбурун кьадар гьикьван ятIа? Хуьрера тандал пек, руфуна фу авачиз мектебдиз физ тежезвай аялар авайдакай хабар яни чаз? Гьафтейралди як незвачир инсанар тIимил авани? Чи мукьва-кьилийрихъ, къуншийрихъ кесибвили басрухгузвайбур, дарман къачудай пул авачиз рекьизвайбур авачни? Са пата фан гъвелер гьисабзавайбур, муькуь пата артух килограмрикай азаб чIугвазвайбур, са пата гишила ахвариз физвачирбур, муькуь пата гзаф тIуьни дакIурнавайбур... ибур вири са хизандин веледар я - чилинвияр я. Са ракъинин кIаник, са Чилин винел са уьмуьр яшамишзавай Аллагьдин бендеяр я. Садбур азаб чIугвазвайбур, садбур масабурун азабар кваз кьазвачирбур. Сомали чавай гзаф яргъа я. Бес чи къваларив гвай«сомаливийрикай» - чи хуьрера, магьлейра каш чIугвазвайбурукай мус хабар кьада чна?
Накь Бакудин метродин «Илимрин академиядин» станциядин патав 85-90 яшарин, гъвечIи буйдин, яхунвиляй кIарабар хкатнавай са кьуьзуьда къекъверагди хьиз гъаб ахъайнавай. Ништа, белки веледарни ава адахъ. Амма бубади каш чIугвазвайдакай хабар авач абуруз. Месе гьатнавай, кIвалин ракIар варцаралди садани ахъайзавачир азарлубур чида чаз. Ихьтинбурун ракIарар ахъайна абуруз жедай куьмекар гун суваб я. Сомаливийрин уьмуьр лагьайтIа, исятда жегьеннемдиз элкъвенва. Са хупI яд, са руфун фу патал кIвал-югъ гадарзава инсанри. Масабуруз муьгьтеж хьанва абур. Вад-ругуд вацран кьурагьвили, кашари, тайифайрин арада авай дявейри, уьлкведин кьиле авай ксарин фагьумсуз сиясатди миллионралди инсанар къекъверагдиз элкъуьрнава. Гзаф дидеяр чпин уьмуьрда рикI атIудай хьтин кардал атанва: абуру са аялдиз аявална, муькуьди гишила гьикI рекьизватIа сейрзава. Сомали чавай яргъа яни? Ваъ, ам гьар юкъуз чи кIвале, чи хизанда ава. Чна гьар юкъуз телевизордай и мусибатдиз килигзава. Вилерай нагъв авахьзава, рикI тIар жезва чи. Анжах идакай а кесибриз куьмек авач. Етимдиз «чан» лугьун тIимил я, фуни гун герек я...
Седакъет КЕРИМОВА
