Poeziya

Bir leysan yağışıyam

Odumu, alovumu

Soyutmaz qış nəsimi.

Tufanlı, fırtınalı

Ağlamaq həvəsimi

Çin etmək istəyirəm.

İçimdə qəm daşlaşıb...

Daşlarla yağam gərək.

Onları ürəyimdən

Atam, dağıdam gərək.

Görən onda əzabım

Bitərmi, tükənərmi?

Görən onda qəlbimdə

Dan yeri sökülərmi?

Bitərmi başdan aşan

Məzəmmətlər, tənələr?

Yorularmı görəsən

Söz üyüdən çənələr?

Görən haçan usanar

Yalan evi hörənlər?

Yalan əkib, cücərdib,

Yalan barı dərənlər?

Yalan baramasından

Çıxan ağ kəpənəklər,

İftiradan cücərib

Uzanan boz tənəklər…

Qara yellər, küləklər,

Qorxulu, pis kələklər…

Bu yabançı ələklər

Ələnib bitənəcən,

Haqq taxta yetənəcən

Ağlamaq istəyirəm.

Dönüb dəli şimşəyə

Çaxmağım gəlir yaman.

Bəndləri, bərələri

Yıxmağım gəlir yaman.

Bir leysan yağışıyam,

Yağmağım gəlir yaman.

Ağlamaq istəyirəm,

Ağlamaq istəyirəm.