Poeziya

Yuxu

Bir qəmli yuxu gördüm:

Guya tənha qayığam.

Birdən qayıq çevrildi,

Döndüm kiçik balığa.

Mənim bu dönüşümdən

Kimsə xəbər tutmadı.

Məni ovlamaq üçün

Bir kimsə tor atmadı.

Dənizdən seyr elədim

Sahildəki evimi.

Mən əsiri olmuşdum

Dəniz adlı sevgimin.

Mənim balıq həyatım

Başlandı bax beləcə.

Mənim balıq taleyim

Oldu acı gülməcə!

Yuxudan oyananda

Bildim gecə yarıdır.

Ürəyimlə danışdım,

Gördüm tamam yaradır!

Boylandım keçmişimə

İllərin arxasından.

Titrək xatirələrin

Yapışıb yaxasından

Silkələdim o ki var,

Dedim, danış, nə olar.

Könlümdə gizlətdiyim

Arzular gəldi dilə.

Bir səsə, bir nəfəsə

Bürünmüşdüm mən elə…

Qaldı tənha qayığım

Görən hansı  bərədə?

Onu soraqlayıram

İndi xatirələrdə.