Poeziya

Qusarım

Salam, doğma Qusarım,

Mənim əziz diyarım.

Darıxmışam səninçün,

Ay istəklim, ay yarım.

Nə vaxtdır aralıyam

Sənin isti qoynundan.

Ərköyün uşaq kimi

Qoy sallanım boynundan.

Doğulub böyüdüyüm

O ev qədər əzizsən.

Şirin xəyallarımda

Necə nurlu, təmizsən.

Səhər-axşam zümzümə

Etsin Şahnabat çayı.

Mənimçün bu nəğmənin

Yoxdur əvəzi, tayı.

Yaşıl meşələrinlə

Ovsunla məni yenə.

Yalına, yamacına

Vurulum dönə-dönə.

Xoş gördük, əziz ata,

Ağrıların keçdimi?

Maliklə Həzrədəki

Bulaqdan su içdinmi?

Qəlbi geniş, şirin dil,

Ay Hüriyyət, ay Gülşad,

Sizinlə görüşəndə,

Ürəyim olur gurşad.

Xoş gördük, ey igidlər,

Salam, müdrik qocalar.

Sizi gördüm, ötüşdü

Canımdakı acılar.

Uca boylu, ağbəniz,

Ay ləzgi gözəlləri,

Sizə bənzər görmədim,

Gəzdim neçə elləri.

Salam, ata-babamın

Babasından qoca yurd.

Mənimçün Şah dağının

Özündən də uca yurd.

Bütün arzularımın

Zirvəsi - sən, başı - sən.

Mənim yeddi arxamın

Torpağı sən, daşı sən.

Anamın uyuduğu

Əbədi məkan səndə.

Torpağın olacağam,

Bu dünyadan köçəndə.

Salam, doğma Qusarım,

Mənim əziz diyarım.

Darıxmışam səninçün,

Ay istəklim, ay yarım.