Поэзия

Ахлад, ахлад

Зун хъуьруьриз алахъ мийир,

Вач аялар, ахлад, ахлад!

Юзур жедач садавайни

Зи хиялар. Ахлад, ахлад!

Хажалатри кьунва зи хур,

РикIи гьикьван ийида цIур?

Ахпагьаз тур, пакагьаз  тур

Куь амалар, ахлад, ахлад!

Къе за гъамар алагъзава,

ТIалдин сварар сувагъзава,

Ван алачиз алахьзава

Залай звалар, ахлад, ахлад!

Сабур закай къакъатнава,

За гъамариз юкь къатнава,

Зи пIузарар акъатнава,

Хьанва ялар, ахлад, ахлад!

ГьикI акъатин и юргъадай,

Авани сад, зи гъил кьадай?

Квахьнава хьи, квев къугъвадай

Зи шад гьалар, ахлад, ахлад!

Дерт ганва чаз садаз тагай,

Мус жеда чахъ бахтар дигай?

Кватнава хьи, зи тандикай

ИкI суалар, ахлад, ахлад!

Зун рекьивай ийимир мад,

Хъуьрез жедан, рикI туштIа шад?

Зи сивин дад, зи вилин хад,

Хъвач аялар, ахлад, ахлад!

Жагъизвач хьи, са ачар заз,

Амайди чахъ “амач”ар яз,

Кхьизва за къе начар яз,

Мийир къалар, ахлад, ахлад!