Поэзия

Таран гуьмбет

Бакуда са гур куьчеда,

Алатнаваз къвалер, патар,

Шумуд йис я, кьванерикай

Хкатнава чинардин тар.

Йифиз-юкъуз дувулрилай

Агъзур жуьред машин физва.

Адан къацу, хъуьтуьл пешер

Авахьунвай пилеш жезва.

Шумуд агъзур сефер адан

Чан хьана тIар, рикI хьана тIар.

ТIалди кьуна чIагана тар,

ГьакI ятIани кьенач чинар.

Адан винел марфар къвана,

Адан кьилел къванер къвана,

Гатана ам гару, хару,

Хьана чинар шулу, сайру.

ТIалар-квалар эхна ада,

Ханавай тан галкIана мад,

Са таватдин кифер хьтин

Хилер къуьнел чкIана мад.

Хъел акатна са пехъидак,

Тар кIанелай атIана, агь!

Иервилин душманар на

Вучиз халкьна, чIехи Аллагь?

Дувулрикай къачуна гуж,

Тара къуват кIватIна са къуз.

Хкаж хьана чиликай мад,

ТIарам асвальт кьатIна са къуз.

Кьил хкудна къванерикай,

ЭкъечIзавай тар акуна,

ЦIай галачиз кана итим,

Пер хайид хьиз хьана итим.

Ам гъавурда акьуна хьи,

Тан рекьидач, рикI аматIа.

Са чIавузни  кьурадач тар,

КIеви дувул, пун аватIа!

Писвиликай галатна кас,

Пашман-пашман алатна кас.

Азадвилин гар галукьна,

Тар са чIибни хкаж хьана.

Кьил цававай кьакьан тарав

Ягъид гъилер агакьзамач.

А кIвал цIуьрдай пехъидалай,

Тараз гьад кьан алакьзамач.

Шумуд йис я Бакуд къене,

Гур куьчедин юкьни-юкьвал,

Хкаж хьанва таран гуьмбет,

Вич вуж ятIа чирун патал.