Поэзия

Уьмуьр вучиз куьруь я?

Уьмуьр вучиз куьруь я,

Са легьзе хьиз, са ял хьиз?

ВерцIи, дадлу хиял хьиз?

Гагь-гагь квахьай йисарихъ

Шехьиз кIанда аял хьиз.

Са уьмуьр бес жедани,

Дуьньядкай дад хкудиз?

Бахтар жував агудиз?

Хьайила гагь рикIни тIар,

Агакь тийиз сятар,

Мажал гьатдач гъиле ви,

Дуьзар хъийиз гъалатIар.

Квадарайбур кIватI хъийиз,

Йикъар, йисар агакьдач.

ЧIур хьайи мансур валай

Дуьзар хъийиз алакьдач.

Уьмуьр икьван куьруь яз,

Зверзава чун каш кьуна.

Са къуз епер буш жеда,

КIевиз ягъайтIан пуна.

Уьмуьр вучиз икI ятIа,

Са гарувай хаз жедай

Чепелукьдин лувар хьиз.

Адакай тух жедани,

Геж алукьдай сувар хьиз?

Уьмуьр акьван куьруь я,

Хиялдизни къведач ви

КIар жедайди ам са къуз,

Туьтуьнавай хтар хьиз,

Хадайди са кутар хьиз.

Уьмуьр яман куьруь я,

Дуьньядин кIвал кири я,

Чунни адан киричи.

Вахт атайла хъфида,

Чун вил ичIиз, гъил ичIиз…