Поэзия

"Самур"

“Самур” газетдин виш лагьай тилит акъатайла

“Самур”, “Самур”, зи кIаниди!

Зи багьади, зи къениди!

Зи хайиди, зи верцIиди!

Зи уьтквемди, гаф хциди!

Йифиз-юкьуз алахъзавай,

Кьулан вацI хьиз алахьзавай,

Чи руьгьдик дад кутазвайди,

Кьегьалрин рак гатазвайди,

Дидедин чIал хуьзвайди зи!

Даим вилик физвайди зи!

“Самур”, “Самур”, зи барка тахт!

Зи геж хьайи кьисметни бахт!

Шагьдагъ хьтин такабурлуд!

Зи абурлуд, зи сабурлуд!

Чи мецера ава ви тIвар,

Вун акъатай гьар югъ сувар.

Бахтар юзаз гара хьурай,

Чахъ суварар пара хьурай!

“Самур”, “Самур”, зи азизди!

Чирна на заз пар ялизди!

Эй къайгъудихъ муьгьтеж велед,

Аллагьди чаз гурай нуьсрет.

Такьатар чи хьурай чIехид,

Акъатдайвал агъзур тилит.

Гьат тийирвал гьич кIевера,

Хайи халкьдиз на эвера!

“Самур”, “Самур”, зи викIегь шив,

Ви гьунарар гекъигин нив?

КьунватIани шумуд тIалди,

Женг чIугвазвайд эл паталди,

Вуч лугьун ваз, кесибди зи,

ГузватIани руьгьдиз рузи,

Вахъ кудайбур тIимил я, агь,

И кар завай эх жени, лагь!

“Самур”, “Самур”, зи чIехи ашкъ!

Зи вил ацIайд, чидачирд каш!

Четинвилер, залан крар,

Кваз такьуна гун за къарар:

Къадирсузри галудайтIа,

Вун рикIелай алудайтIа,

За датIана агудда вун,

“Самур” газет! Акъудда вун!

Аваз хьурай, аваз, “Самур”

Халкьдин верцIи аваз Самур!