Поэзия

«Лезгинкадал» илига

Ягъ, я стха, «Лезгинкадал» илига,

И макьамдин аламатдиз килига.

Далдамдинни зуьрнедин ван атайла,

Адан аваз зи дамарра гьатайла,

Чил зурзада, зи кIвачериз звер къведа,

Шад жеда зун, зи вилериз хъвер къведа.

Ягъ, я стха, «Лезгинкадал» илига,

Ви ялавдик куькIуьра зун, алуга.

Элкъуьра зун, гелкъуьра зун, галуда,

Вири дердер зи рикIелай алуда.

Хажалатар пара хьанва зи чанда,

Гъариб я зун жуван хайи Ватанда.

Лезги стха, «Лезгинкадал» илига,

Чун гьин йикъаз аватнатIа килига.

Вич вуж ятIа рикIел алач парадан,

Кьегьал ксар пурчук хьанва чарадан.

Ягъ, «Лезгинка»! Шехьа, цIвагъа, гьарая!

Вичин сихил чизмачирбур пара я.

Ягъ, «Лезгинка», чи фикирар зурзура,

Чи рикIерин живер, муркIар цIурура.

Хура рикI ваъ,  къван авайбур жагъура,

Япа кичIе ван авайбур юзура.

Кьуд патахъай вири канва лезгияр,

Вучиз икьван усал хьанва лезгияр?

Са тIвар ама лезгидилай, са макьам,

И дуьньяда авач ихьтин чIехи гъам.

Руфуна фу, тандал пекер ала чи,

Гъилера гуж, чанда такьат ава чи.

Гьеле хьи, чаз бубайрин кIвал амазма,

Гьеле хьи, чав дидедин чIал гумазма.

Лезгивилин маса лишан аматIа?

Чи рухвайрихъ яраб гьунар куматIа?

ТахьайтIа чахъ чIехи къванер галукьда,

Чун чи чилел чил амачиз амукьда.

ЧIулав бахтар несиб жеда йифера,

Гьамишалух акIида чун кIевера.

Амукьда чун цирибар хьиз кIвачерик,

Акатда чун чан аламаз накьварик.

Ягъ, чан стха, «Лезгинкадал» илига,

Ахъая вил, на кьуд патахъ килига.

Къе са зурба пар ава чи далуда,

Ксанва чун, ша ахварай авуда.

Чир хъия чаз чун гьим ятIа, вуж ятIа,

Элкъуьра чун, лезги хъия, жедатIа!