Поэзия

Зи халкьдикай ихтилат

Агата завди дуст, эй къариб мугьман,

Ихтилат ийин за, ви рикI ацIурай.

Гьи жуьре мисалар, гьихьтин кьисаяр

Рахан хьи, ваз анай зи халкь акурай?

Зи заха халкьдикай, сая халкьдикай,

Гьар са чIал са ширин баяд халкьдикай,

Зи Кьуьчхуьр, зи Эмин, Саяд халкьдикай

Ваз хабар атурай, суракь атурай.

Зи кесиб югъ акваз дегиш мийир гьал,

Мугьмандиз авайд я чина тавдин кIвал,

Зи халкьдиз чидайд туш я дяве, я къал,

Намусдик хкIурнан, яракь атурай!

Кис хьана къваз жедан кьегьалбурувай?

Лезгияр рам хьанач кагьалбурувай.

Са чIавуз чахъ гьихьтин кьегьалбур авай……

Кьегьалвал хуьн мадни, кьил вине хьурай.

Лезгидинд дуьзвал я, кIандач адаз таб,

Чинра ваз аквадач къекъверагдин гъаб,

Зи халкьди женгера гайиди я таб,

Алупанд чилел чаз чи Рагъ акурай.

Ваз квекай гафин за, я къариб мугьман,

Арха я заз даим зи чIал - зи лукьман.

Ватандин къванерал гъидай кьин, иман,

АватIа, на маса са халкь жагъура.