Поэзия

Вулкан

Зун къекъерай акъатиз кIанз

Гьазур хьанвай са вулкан я.

Са цIелхемдик цIигел я зун,

КIанзавайди цIук кутан я.

Зи дегьнейра ифин ава,

Кьиляй-кьилиз ялав я зун.

Са багьнадин суракьдавай

Пархуннавай са чIав я зун.

Зи чанда са тIурфан ава,

Какахьнавай цIвагьни гьарай.

Зи чанда са шуван ава,

АтIузва зи рикIин кьарай.

Гьеле зи гум яргъал физвач,

Гьеле хьи, чим гума жував.

Гьеле хьи, зун секинзама,

ЧкIурнавач гьеле за чав.

И секинвал фидач яргъал,

Гьатда цава гугрум-пакьракь.

Акатда цIай садлагьана

Зи вулкандик - чIехи хьрак.

Дегь чIаварин цукIар гва зав,

Яваш-яваш куькIуьнзавай.

Дердерикай туькIвей вулкан

Туьхуьнар жеч завай-вавай.

Гьеле хьи, зун юза хьанвач,

Жуван мука икI киснава.

Гьеле хьи, зун ахъа хьанвач,

За хъилен рак игиснава.

Гьеле къенер хъухъвазва зи,

Ялаври зун алугзава.

Алатзавай гъар легъзеди,

Зун тIурфандив агудзава.

Зи хура са вулкан ава,

Сур¹ чIавари ксурнавай.

Зи хура са вулкан ава,

Дердери ам юзурнава...

¹сур - къадим.