Поэзия

Ви ракIарар гатазвачтIа дустари...

Гатфарин сел алахьдайвал  ван алаз,

Дустарин луж алахьна зи кIвалелай.

Абур патал гьар са кардихъ къуьн галаз,

Бахтлу йикъар кими хьанач кьилелай.

Ахъа хьана рикIер марвард цуьквер хьиз,

Лугьуз, хъуьрез, аялар хьиз авай чун.

Фикирдин гел хьайилани вилерал,

Къакъуд хьанач садавайни чавай чун.

Гьуьлуьн кIаняй жагъурдай хьиз инжияр,

За жувазди дустар сад-сад хкяйда.

Тавдин кIвале ацIай суфра, ацIай рикI,

Абрун вилик за хвешила экIяйда.

Дад жедани дуст авачир уьмуьрдихъ,

Гьар дуст заз чиз, са экв гудай чирагъ я.

РикIе чими, хъуьтуьл гьиссер авайда,

Вучда яцIу гафарикай алаз яргъ?

Эциг мийир вуна кьакьан дарамат,

Ви ракIарар гатазвачтIа дустари.

Садбур гзаф девлет кIватIиз дакIвада,

КIвач атIуда хайибурун, часпаррив…

Вахъ агъзур дуст хьайитIани гзаф туш,

Тек са душман аватIа - им пара я.

Дуствили ваз шадвал гъида датIана,

Душманвилин ниятни рехъ чара я.

Душман аваз уьмуьр гьалун четин я,

Хъсан дустар аваз хьуй гьар инсандихъ.

Къайивили къай кутада, чIурда кIвал,

Дуствилери ялда бахтлу хизандихъ.

Дустарикай стха жеда, эл жеда,

Са жув патал уьмуьр гьализ жеда кьван?

Вил вегьейла, Гъуцар сувун ценера,

Аквадач квез ялгъуз авай тек са къван.

Кесиб я вун, авачтIа вахъ рикI кудайд,

АватIа дуст, вун бахтлу я, заха я.

Кьуд патахъай чуькьвейла вун гъамари,

Жуван дердер на дустариз ахъая.

Чи бубайри лагьайди тир рикIивай:

“Дуст течир кас, яд авачир регъвер я.”

Пехъивилин, векъивилин хура къе,

Акъваз жедайд тек дуствилин муькъвер я.

ГьатайтIани яцIарани кIевера,

Дуствал чна багьадиз кьан гьамиша.

Куьтягь тежер девлет тушни гьар са дуст,

Зи хайибур, куьн дуствилин гъенел ша.

Эй зи дустар, кьулухъ галай дагълар зи!

Куь хурувди агудда за жуван кьил.

Къаларив ваъ, хъилерив ваъ, ша анжах,

Дуствиливди хуьз алахъин хайи чил.