Поэзия

Чир хьанайтIа

Вучиз йигин хьанва зи кIвачерин звер?

Бегьер кIватI жедани янавачтIа цIвер?

Гатфарин цуьк я зун, зи тIвар я гъвергъвер,

Шумуд югъ ама захъ, хупI чир хьанайтIа,

Вуч жедай, уьмуьрди заз сир ганайтIа?

Са кIус инсаф ая, эцигайла кам,

Завай дуьньядикай къачуз хьанвач кам,

Фадлай захъ цIигел я чи гуьне, чи кIам,

Ватандин накьвадал за цIир ганайтIа,

КIандай заз цIаяри зи хур канайтIа.

ЗуракI тир шииррив ацIанва зи рикI,

Муьгьлет це, акалдай гафар цIиргъиник,

Зун буржлу жедайни илгьамдин вилик

Алатай къар завай элкъуьр хьанайтIа?

Зи уьмуьр гьикьван я, заз чир хьанайтIа...