Поэзия

Тек са зун

Вилин накъвар авахьзава чарчел зи,

Гъери къвезмач гьикьван чIав я, кварцел зи,

Уьмуьрд гурар куьрс хьанва са кIарцIел зи,

Дерт ахъайдай сад авачиз, тек я зун.

РикIин гафар лугьуз тежез хьанва пар,

Гатун цикIиз шагьвардикай хьанва гар,

И бендедиз дуьнья вични хьанва дар,

Ни лугьуда, дагъдин кукIвал лекь я зун?

Зун вацIари, зун селлери гъайиди,

Зун цIаяри, зун ялаври кайиди,

Парабуруз  зун яргъалди, къайиди,

Агатмир зав, саврух я зун, мекь я зун.

Вилик-кьилик гала лугьуз гьар тула,

Ифин амач, къафун амач гьар къула,

Къвекъвераг хьиз далудаллаз пар, кула,

Юргъунвал я, галатун я, гьекь я зун.