Поэзия

Дагъларал кьин кьада

Вучиз чун хиялри ялда яргъарихъ?

Вучиз чаз гирвеяр, кукIушар кIанда?

КIамара, аскIанра кьарай квахьда чи,

Кьакьанрив гьуьжетун ава чи чанда.

Вучиз чун кьару я дагъларал икьван?

Чигерни, циферни кIани я рикIиз.

Цуькведив дигида гуьнеяр, пелер,

Дагъвидин мурад хьиз, гатфарин цикIиз.

Лезгидин такабур, абур я дагълар,

Лекьре хьиз муг ийиз кьакьан чархарал.

Кьакьанвал рам ийиз циферин кIаник,

Лезгид кIвал эцигда дагъдин яхадал.

Вучиз чи рикI ала синерал икьван?

Такуна эх жени къацу яйлахар?

Дагъларай яргъара бахт авачирдан

Гьахълу яз авунва лезги чIалахъар.

Вучиз чун гьейран я кьуталрал икьван,

Иервал гекъигиз даим чIафарив?

Дагъларин макандин шаир ятIа зун,

ГьикI тесниф тийин за дагълар гафарив?

Эй элкъвей кьуталар, какур хъиткьерар,

Эй цIалцIам рагарин сварар, чIидгъерар,

Эй чIехи кьвалерин хкатай синер,

Эй дагъдин хъенерик юзазвай ценер,

Синерал рекIв гузвай живед маргъалар,

Чи рикIин къеневай кукIар - яргъалар...

Дагъвидиз таб чидач, гьахъсуз рахадач.

Дагъларал кьин кьада гьатайла кIеве.

Гьавиляй дагъвидин дегь чIаварилай

Дагълариз икрамин гьатнава хиве.