Поэзия

Мураддин балкIандал

(Зи рушаз Севдадиз)

“Чан диде, са шиир тесниф ая заз,

Тарифар ая зи, вуна рикI алаз.

Гьар са гаф, гьар са цIар хьурай рикIиз хуш”, -

Лагьана хъуьрена милидиз зи руш.

Вуч лугьун за жуван хару веледдиз?

Вуч лугьун дуьньядин и набеледдиз?

ГьикI къалун кIанивал баладиз жуван?

Дидед ашкъ алцумдай мизанар аван?

Фикириз амай зун хиялрин къене,

Цуькведив диганвай дагъларин гене.

Акъатна зи вилик са лацу балкIан,

Фиридиз иер тир, кIвачерал кьакьан.

А шивдин акунрал гьейран хьана зун,

Адав гвай аламат, суьгьуьр аку тIун!

Лацуда авай ам, лацу мурад хьиз,

Ргана зи цIарар булахдин яд хьиз.

Къастунал кIевид хьухь зи велед, зи руш,

Кьегьалди вичин шив дегишардайд туш.

Яргъариз фин патал хьанватIа кIвачин,

БалкIандал акьахмир леэнар квачир.

Четин я лугьумир уьмуьр къерехда,

Кьегьалди къерехдин тIаларни эхда.

Пурарал акьахиз жедачтIа вавай,

Уьзенгдал кIвач тамир, пашман тахьурай.

Багьнадлай хатур хаз, къализ ишемир,

Кьенерар алатай балкIан хьиз жемир.

Кьенерар расай кас туштIа сересди,

БалкIандиз чир тийин герек иесди.

Виридлай чIехи дуст кьуртIани на ам,

Душман хьиз акьаха, чукваз, къачу кам.

КIевера гьатайла гум квачиз кумир,

БалкIанни маса це, кьенерар гумир.

Гатал кьару жемир, гад алатдайд я,

Масдан балкIандилай фад аватдайд я.

Чарадан гъуьрч кьамир вегьена турар,

БалкIан багъишайдаз багъиша пурар.

Тепедиз лугьумир “дагъ я, кьакьан я”,

Ябудиз лугьумир “шив я, балкIан я”.

Лекьрен гуж жедани нуькIрен луварда?

Шив кьейла, чир хьухь ваз, ябуд суварда.

Чан руш, ажузд жемир, гафар уьтквемд хьухь,

Са кардал гьалтайла викIегьд, бегьемд хьухь.

Къекъерай акъатна сел хьиз алахьмир,

Садрани гьахъсузвал эхиз алахъмир.

Зи гафар ван хьурай веледриз вири:

КIвачерик тваз тахьуй балкIандин фири!

Хуьрай чи Гъуцари, аваз хьурай куьн,

Мураддин балкIандал алаз хьурай куьн!