Поэзия

Харар аку

Ирид арха жагъурна за,

Ирид дагъдин а патакай.

Ирид чилер тIушунна за,

Са кап гьалал фан патакай.

Ирид жуьре гьал хьана заз,

Ирид дердин звал хьана заз,

Ирид тIалди тIагъ гана заз,

Ватан рикIе тван патакай.

Ирид чIалал билбил я зун,

Ирид чIаван сефил я зун,

Ирид ванцин кфил я зун,

Шезва рикI а ван патакай.

Ирид чIалал рахайтIани,

Ирид цIуз зун вегьейтIани,

Ирид кIусда за зи чанни,

Дидедин чIал хуьн патакай.

Ирид чилел къекъвена зун,

Ирид патай чуькьвена зун,

Халкьдин рекье женгина зун

Кьулухъ хьанач чан патакай.

И дуьньядин крар аку,

Седакъетан цIарар аку,

Чал къвазавай харар аку,

Чун лукIар хьиз тан патакай...