Поэзия

ГъалатIар

Зи уьмуьр гъалатIар...

За авур кIвалахар гъалатIар...

Зи кьинер, чIалахъар,

Зи кьилел къвайи хар,

Зи гафар, зи чIалар,

Зи ялар, зи гьалар,

Хура звал къачузвай зи тIалар,

ТIаларай кIвахьзавай стIалар...

Вилериз акур кьван саврухар,

Душманри авур кьван басрухар,

ГъалатI тир зи кесиб алухар,

ГъалатI тир за авур чалухар.

Закай гьяз хъийизмач

Жува руьгь гайида,

Заз эхъен къалузмач

Тар лугьуз цайида.

Жува къуьн гайиди

Захъ далу элкъуьриз,

Жува экв гайиди

Ава вил къекъуьриз.

Женг гъалатI - халкь лугьуз акъатай,

Генг гъалатI - пIир лугьуз агатай.

ВутI хьана чан лагьай дустар зи?

ГъалатI ян мефтIедин мастар зи?

Заз амайд галатар,

Заз амайд фикирд пар.

Яла рикI, эха рикI,

ХьайитIан пара тIар.

На авур кIвалахар

ГъалатIар, гъалатIар…