Лезги халкьдин манияр

Перизада
Лугьузва Гъилик ая

Эслидилай алатайла,

Пара кайи Лейли я зун.

Къарибдавай иер гада,

Ви дердинай дили я зун.

Мегъуьн патав къайи булах,

Вун булахдал къведани, яр?

Икьван кIани вун рикIеваз,

Зун масадаз фидани, яр?

И патарай эверналди,

А патариз ван жедани?

Яр я лугьуз чарадан хва,

Икьван рикIиз кIан жедани?

Вили цавун циферикай

Ярдиз кьилин четир кIандай.

Зи чандавай дердерикай

Лугьуз шехьдай чуьнгуьр кIандай.

Шарвилидин мехъер
Лугьузва Гъилик ая

Чи мехъер я, ая кьуьлер,

Ая кьуьлер, ая кьуьлер.

Ая кьуьлер, я чан эллер!

Я чан эллер, я чан эллер!

Я чан эллер, бул хьуй мелер,

Чи гъизвай свас я вуч иер.

Экв ятIа ам цаву гайи,

Цаву гайи, цаву гайи.

Нек ятIа ам векьи гайи,

Векьи гайи, векьи гайи.

ЦIир гайи хьиз хкечIна ам.

Тар хьиз чилел экъечIна ам.

Я чан эллер, ая кьуьлер,

Ая кьуьлер, ая кьуьлер.

Къе чиди я зурба мехъер,

Зурба мехъер, зурба мехъер.

Гъуцари хуьй Шарвили вун,

АцIурнавай шадвилив чун.

Шарвилидин сусан мани
Лугьузва Гъилик ая

(Гафар: С.Керимова)

Свас тухузва иер Сувар,

Шадвилева чилер, цавар

Тахтунава къе чамвилин,

Элдин кьегьал хва Шарвили.

ЦIийи хизан туькIуьрзавай,

ЦIийи эквер куькIуьрзавай,

ЭкъечI кIваляй, экъечI чи свас,

Бахтар гуй ваз чамрахъ галаз.

Куь тавдин кIвал къени хьурай,

Куьн гъуцариз кIани хьурай

Уьмуьр гьала бахтавар яз,

Хуьх чи лезги эл рикI алаз.

Эсли-Керем
Лугьузва Гъилик ая

Эсли-Керем

Агъадикай зул къвезава,

Кьакьан дагъдиз мани лугьуз.

Айвандилай Эсли шезва,

Аман Керем, кая лугьуз.

Къарагъ Эсли, къавал экъечI,

Къаваллайди яр ятIа (а)ку.

Заз кIвачерин ван къвезава,

Ам зи гуьзел яр ятIа (а)ку.

Эслидилай алатайла,

Пара кайи Лейли я зун.

Къарибдавай иер Керем,

Ви дердинай дели я зун.

Кьакьан дагълар
Лугьузва Гъилик ая

Кьакьан дагълар

Кьакьан дагълар мад кьакьан хьуй,

Агъа патар аквадайвал.

Вун булахдал нянихъ ша,

Чун масадаз таквадайвал.

Дагъларавай живер цIураз,

Кьулан вацIуз сел къведани?

Вили кьуна кIани хьайбур,

Багьнадилай хъел жедани?

Рушан мурад
Лугьузва Гъилик ая

Рушан мурад

Дагъдин сине са яд ава,

Са яд ава, рагъул тежер.

Рушан рикIе мурад ава,

Рекьидалди лугьуз тежер.

Зун галайнихъ вил вегьена,

Яр айвандал къекъвезава.

Ярди гайи яйлухдикай,

Заз атирдин ни къвезава.

Чи кIвализ къе экуьнин гъед,

Экуьнин гъед илифнава.

Чан зи рикIи кьур кIани яр.

Нуьгед ич хьиз къекъифнава.

Ширин-ширин
Лугьузва Гъилик ая

Ширин-ширин

Са варз кьван я чи араяр серин я,

Зи муьгьуьббат гьуьлерлайни дерин я.

Са юкъузни фидач хьи, вун рикIелай,

Гьич вакай зи вил атIудач, ширин я.

Зазни пара кIандай вакай яр хьана,

Тахсир зид туш, ам бубадин кар хьана.

Закай инжиклу жемир вун, кIани яр,

Ви рикIелай бетер зи рикI тIар хьана.

Сир гьикI гуда
Лугьузва Гъилик ая

Сир гьикI гуда

Гур булахдин къайи цикай,

Са истикан яд це на заз.

Гада, за вав сир гьикI гуда,

Белки несиб жедач жал ваз?

Бахтавар я Эслидин югъ,

Мулдин цуьквер сурал алай.

За ваз рикIин сир гьикI гуда,

Ярдин лишан хурал алай.

Тарал алай лацу пIини,

Гар галукьна яд хьанайтIа.

Маса къайгъу жедайни заз,

Чи кьведан рикI сад хьанайтIа?

Лезгид руш
Лугьузва Гъилик ая

Лезгид руш

(Гафар: С.Керимова)

Я лезгид руш, лагь вуна заз,

Вавай рикI зав гуз жедани?

«Ваъ» лугьумир икьван хъел кваз,

Зун ви цIаюк куз жедани?

Я лезгид руш, лагь вуна заз,

Вавай зи рикI хаз жедани?

КIанидан тIвар мецел алаз,

Чарадан гъил кьаз жедани?

Я лезгид руш, лагь вуна заз,

Икьван иер наз жедани?

Лацу лифрен дамахар гваз,

Вун зи кIвале свас жедани?