Дневник
Куьреда сувар
2020-07-09
Кьасумхуьре 2020-йисан 19-октябрдиз райондин 90-йисан юбилей гзаф гурлудиз къейд авуна. 1969-йисан 12-майдиз чи чIехи шаир СтIал Сулейманан 100-йисан юбилейдихъ авсиятда райондин тIвар дегишарнай. Гьа чIавалай ам СтIал Сулейманан район хьиз сейли я.
Юбилейдин юкъуз район халисан суварин гьавада авай. Ленинан гуьмбет алай майдандал 10 агъзурдалай гзаф инсанар кIватI хьанвай. Анал туькIуьрнавай кьакьан сегьнедилай кьуд патаз маничийри лугьузвай манийрин ванер чикIизвай. Халкь шадарун, адан руьгь хкажун патал вири жуьредин алахъунар авунвай. Инсанар кIубандаказ, хвешиз, кьил виневаз къекъвезвай.
Райондин кьил Нариман Абдулмуталибова виридаз сувар мубаракна райондин агалкьунрикай рахана. Сувариз атанвай Дагъустандин гьукуматдин регьберар, тIвар-ван авай инсанар майдандал къалурзавай райондин 90-йисан тарихда кьиле фейи вакъиайриз талукьарнавай сегьнейриз килигиз эгечIна. 200-елай гзаф аялри иштирак авур и программади кIватI хьанвайбурук руьгь кутуна. Вишералди гъвечIи аялри, жегьилри, яшлубуру милли пекер алаз иштирак авур и тамашади, гьакIни районда суварихъ авсиятда акунвай вини дережадин гьазурвилери вири гьейранарна.
Концертдиз кьилди Бакудай «Самур» газетдин коллективдиз ва «Сувар» ансамблдин солистризни эвернавай. Йифиз салютдин вахтунда инсанри майдандал халисан дем кутуна. Вишералди инсанар кьуьлуьник экечIна. Авайвал лагьайтIа, икьван гагьди чаз ихьтин тешкиллу, ихьтин гурлу ва руьгь кутадай сувар акурди тушир.
