Поэзия

Зун

РикIи завай хабар кьазва: - Вуж я вун?

- ТIвар алачир гьиссерин варар я зун.

Йифиз-юкъуз гьарай кутаз алахьдай,

Секин тежер, ргазвай чарчар я зун.

Зун сакIани гьатзавач хьи, кIалубра,

Икьван чIехи дуьньядизни дар я зун.

КъарагъайтIа садавайни хуьз тежер,

КIалуб течир, часпар течир гар я зун.

Зи цIаярал яд иличиз алахъмир,

Ялав галай, гурва галай хьар я зун.

Са халкьдин фак дад кутадай, тIям гъидай,

Фад дакIунна геж элякьдай гъвар я зун.

Фад ацIана, фад къвана, фад алахьдай

Гатун юргъ я, марф какахьай хар я зун.

Саврухариз викIегьдаказ таб гудай,

Чуьлдин юкьва ялгъуз амай тар я зун.

Зи кIелдайди, зи гьал хабар кьадайди,

Ваз акI жемир гзаф бахтавар я зун.

Секинвилик, регьятвилик гелкъвезвай,

Са бахтсуздан вилерин накъвар я зун.

Жумун тарал хъипи хьана аламай,

Кьакьан хилен атIуз тежер бар я зун.

Са макьамдихъ тамарзу тир, вил галай,

Сим атIана зарул хьанвай тар я зун.

Илгьамдикай шумуд кIеле раснавай

Куьтягь тежер амаратдин вар я зун.

Гафаривди вири дуьнья рам авур,

Са шаирдин зуракI амай цIар я зун.

Къе хайи чIал жуван вилин нине хьиз,

Хуьн тавуртIа, зи ватанда хар я зун.

И дуьньяда гьамишалух амукьдай,

Лезги халкьдиз са заридин тIвар я зун.