Поэзия

Сел жеда

ЛукI хьиз муьтIуьгъ, кIамаш ксар акурла,

ЦIай галачиз ялав кьуна зун куда.

Усал хьана за мет чилиз ягъайтIа,

Агъдин цIирх хьиз пад-пад ийиз зун гуда.

Хайи чил, ви аламатар пара я,

Зи чандавай тIалариз вун чара я.

Ни лугьуда, рикI тандивай чара я?

Зун зи тандиз - зи Ватандиз элкъведа.

Вун зи диде, зун ви велед, хайи чил,

Алпандилай аманат тир лезги чил.

Хуьн тавуртIа Ватан, къе ви хци чил,

Усал хьана, ажуз хьана чун шеда.

Ватан тар я, чун я адан хилер хьиз,

Лув гун чна ви цавара лекьер хьиз.

Пелеш хьайтIа зулун хъипи пешер хьиз,

Ви накьвадал аватна зун рекьида.

Захъ вил галаз фикир чIугда никIери,

Кьулан вацI хьиз ишез жеда Гуьлгери.

ИкI амукьич, зи Ватандин лекьери

Са къуз зи тIвар мад рикIерал хкида.

Квез веси хьуй, чIур хьайитIа зи гьалар,

Аманат хуьх зи манияр, зи чIалар.

Жувахъ галаз тухвайтIани и тIалар,

Кьил хкудна чиликай за хълагьда:

Гардан кIирун ламатIвал я, гьунар туш,

КьанатIвилер къахчунар я, гунар туш,

Чун дерт авай кьегьалар я, къванер туш,

Гъуцари чун са къуз рикIел хкида.

Чи гъавурда авайбуруз чун тIалар,

Дердерикай туькIуьрнавай кIватIалар.

Къе марфади ракъурнавай стIалар,

Пака санал чун са чIехи сел жеда.