Поэзия

Ватан вуч я?

Я лезги хва, я лезги руш,

Ватан вуч я, чидани ваз?

Ви япара гьатнани лагь,

И манидин верцIи аваз?

И гафуни рикI атIана

Ви вилерал нагъв гъанани?

Садрахъни вун Ватанд чилел

Темен гана ярх хьанани?

ВерцIи яни, туькьуьл яни,

Чир хьанани накьвадин дад?

Акунан ваз Ватандин гьал,

Ватандин кьуьд, Ватандин гад?

АкунатIа,

Садра вуна,

Ватандин дерт

РикIе туна

ЦIвагънани лагь?

Агънани лагь?

Вучиз икьван

Канва ви тан,

Къанва ви тан,

Хайи Ватан.

Кайи Ватан,

Къайи Ватан.

Чун къужахда

Хвейи Ватан.

Ви веледри

Къурбандна чан,

Мус ийида

Ви чил кIубан?

ЧIехи Ватан,

Реехи Ватан!

Ватан - зи тан,

Ватан - зи чан.

Ватан - зи цав,

Ватан - зи къав.

Бубад кIвалин

ДакIардавай

Экв я Ватан!

Дидеди чаз

Хурал кьуна

Чими-чими

Гьар къуз гайи

Нек я Ватан!

КIелед хуьруьн1

Къванцин пелел

Гатфар чIавуз,

Япаялгъуз

Ахъа хьанвай

Цуьк я Ватан!

Заз Яргун я, ваз СтIурар,

Са масадаз Ахцегь, Миграгъ,

Чи хвал, чи вацI, чи къубуяр,

Чи дагъ, чи чуьл, ник я Ватан!

Гьа и тегьер и дуьнья чаз

КIани авур рикI я Ватан!

1КIелед хуьр – Яргун хуьре пел

Ватан - муг я,

Цекверизни,

НуькIеризни,

Ятар пара

Яргъал фидай

ВацIаризни

Муг авайд я.

Ватан вични

ТуькIуьрайд я

КIвалерикай,

Мукарикай.

Муг тавуртIа,

Хуьр тавуртIа,

Мукьва-кьилид

Жуваз арха

Кьун тавуртIа,

Усал жеда.

Алпанди чаз

Ганвай хай[1] чIал

Хуьн тавуртIа,

Ягъал жеда.

Аман-минет,

Я лезгияр,

Квез аян хьуй

Зи гъарикI гьал.

РикIел хкваш,

Халкь амачиз,

Дуьньяд винел,

Етим хьайи

Латиндин чIал.

Дуьшуьш тахьуй

Ихьтин кар чал.

ЧIал амачтIа,

Ватан амач.

Халкь авачтIа,

Ватан авач.

Ватан - диге,

Ватан - кIвал я.

Авач, амач

ХьайитIа чахъ,

Чи мез лал я.

Эй лезгияр,

КIеви хуьх кIвал,

КIеви хуьх чIал,

Ватан - кIвал я.

Ватан - чIал я!

Ватан вуч я?

ЧидачтIа ваз,

И чиликай

АтIана кIвач,

Яргъариз вач.

Маса накьвар,

Маса чилер,

Маса халкьар,

Маса эллер,

Маса рикIер,

Маса вилер

Акурай ваз.

Маса чIалал

Рахадайбур,

Къар масакIа

Ракъурдайбур

Акурай ваз.

Ингье, са къуз,

Кузни-хкIуз,

Яргъарай хьиз

Ви япариз

«Лезгинкадин»

Ван атайла,

Ви чанда са

Звал гьатайла,

Вахъ дердияр

Агатайла,

РикI чандивай

Къакъатайла,

Жузада за:

Я лезги хва, я лезги руш,

Ватан вуч я, чидани ваз?

Ви япара гьатнани лагь,

И манидин верцIи аваз?

Жаваб течиз амукьда вун,

Ватан вуч я лугьуз жедач.

Гъейрет авай ксаривай,

Ам авачиз эхиз жедач.

Вад хафункай1 туькIуьрнавай

ГъвечIи са гаф ава - «Ватан».

Чи рикIера дидедиз тай

ЧIехи са гаф ава - «Ватан»!

1хаф -  гьарф