Поэзия

Самурдин вацI

Рагъ эхъвезва ви ятара,

Экуьн хийир, Самурдин вацI!

Са хабар це а патарай,

Зи квахьнавай сабурдин вацI!

Гьикьван гагьди гелкъведатIа,

И тамарихъ, тепейрихъ зун?

Вучиз икьван цIигел ятIа,

Ви каф алай лепейрихъ зун?

Чи гъамарин сел яни вун,

Ван кутуна алахьзавай.

Лезги чилин шел яни вун,

ЧIехи гьуьлуьхъ какахьзавай.

Ваз минет хьуй, зи хайи чил

ИкI кьве патахъ паймир вуна.

Чун дуьньядин ватан течир

Ватансузриз таймир вуна.

Варз эхъвезва ви ятара,

Няни хийир, Самурдин вацI!

Чи тIалариз ая чара,

Эй зи халкьдин абурдин вацI!