Поэзия

Заз аял жез кIанзава

       Хъуьремир зал, я дустар,

Заз аял жез кIанзава.

Мад сеферда дуьньядиз

БицIек хьиз къвез кIанзава.

Шерехвализ, капа физ,

Алахъзавай кIвачи физ,

Шиндакьдай за датIана,

Кьеб кIанзавай аял хьиз.

ТIарам тангарин къене

Амукьдайвал яргъи къуз.

Ксуз-къарагъдай ана,

Дуьньядикай хабарсуз.

КIвалахри юргъунарна,

Хизанди галудайла,

Зи фикирри аял хьиз

Гуьгъуьна галтугайла,

Зи квахьзавай иервал

Гуьзгуьдай зал хъуьрейла,

Зун садани тIатIанвай

Тут хьиз тарал кьурайла,

Зун къайгъуйрин хуруда

Амукьайла сефил яз,

Зун кIевера гьатайла,

Пакагьак муд тIимил яз,

Четинвилер марф хьана

Кьилелай алахьайла,

Жагъин тийиз са чара,

Югъни йиф какахьайла,

Заз аял жез кIанзава!

Эгь, чIехид жен са шей туш.

Заз аял жез кIанзава,

Дердер хьайла зал алтIуш.

Чун вири аялар я,

Яшар чIехи ятIани.

Жив чкIана мегерал,

ЧIарар рехи ятIани.

Чун аялар туширтIа,

Кьве къалай сад шехьдачир.

Къван акьунвай аял хьиз,

ДакIуниз элякьдачир.

Хару аялар я чун,

Дуьньяда гьармад жуван.

Вилер шехьда аялрин,

Чун шехьда - рикIе шуван.

Зал хъуьремир, я дустар,

Заз аял жез кIанзава.

Мад сеферда дуьньядиз

БицIек хьиз къвез кIанзава...